Ibyerekeye SUNCASA

SUNCASA ni umushinga ushyira imbaraga mu guhangana n’ingaruka z’imihindagurikire y’ibihe no kubungabunga urusobe bw’ibinyabuzima muri Dire Dawa (Etiyopiya), Kigali (u Rwanda), na Johannesburg (Afurika y’Epfo), binyuze mu gusubiza ibyifuzo n’ibikenewe byagaragajwe n’abaturage b’aho. Binyuze mu gusakaza ibisubizo bishingiye ku bidukikije (NbS) byibanda ku kubungabunga no gusana ibyogogo hubahirizwa n’ ihame ry’uburinganire n’ubwuzuzanye, uyu mushinga ugamije kongerera imijyi ubushobozi bwo kunamba mu bihe bidasanzwe n’ibihe by’ibiza biturutse ku mihindagurikire y’ikirere harimo n’imyuzure.

Abaturage bagera kuri miliyoni 2.2 batuye mu duce dukunze kwibasirwa n’imyuzure bazungukira mu bikorwa bya NbS byita no ku ihame ry’uburinganire. Byongeye kandi, abaturage bagera kuri miliyoni 7 bazagira inyungu mu kongererwa ubushobozi bwo guhangana n’ibibazo byo kubura amazi mu mijyi, ubushyuhe bukabije, inkangu, n’isuri, kandi bazabasha kubona imibereho irambye kandi itangiza ikirere binyuze muri uyu mushinga.

Bimwe mu bisubizo bishingiye ku bidukikije bizashyirwa mu bikorwa na SUNCASA birimo gusana ubutaka bwangiritse muri Dire Dawa no muri Kigali, gutera amashyamba no kuvugurura amashyamba yangiritse muri Kigali, ndetse no kurandura ibimera by’inzaduka byangiza umutungo w’amazi mu gace umugezi wa Jukskei uherereyemo i Johannesburg. Uretse ibyo bikorwa byo gusana, SUNCASA izavugurura inkengero z’imigezi n’ibishanga ndetse inongere ubuso buteyeho ibiti mu mijyi hagamijwe guhangana n’ingaruka z’ubushyuhe bukabije bwo mu iyo mijyi uko ari itatu.

Uburyo dukoramo

Umusaruro uzatangwa na SUNCASA ushingiye ku byiyumvo bitatu by’ingenzi:

Gusobanukirwa neza n’ingaruka z’imihindagurikire y’ibihe n’uko zibasira abagabo n’abagore mu buryo butandukanye bizatuma abantu barushaho kwakira NbS zishyizwe mu bikorwa hubahirijwe ihame ry’uburinganire n’ubwuzuzanye.
Abafatanyabikorwa b’ahakorerwa umushinga bafite ubushake no kwiyemeza kwakira ibisubizo bishingiye ku bidukikije (NbS) nk’uburyo bwiza kandi bw’ingirakamaro bwo guhangana n’ibibazo by’imihindagurikire y’ibihe.
Abayobozi b’inzego z’imijyi n’abandi bafatanyabikorwa biteguye guhindura uburyo bw’imiyoborere kugira ngo barusheho kwita ku buringanire,ubwuzuzanye, kudaheza no gushyira mu bikorwa ibisubizo bikwiriye.

Intego zacu

Umushinga wa SUNCASA ugamije:

gutegura no gushyira mu bikorwa ibisubizo bishingiye ku bidukikije (NbS) byita ku buringanire n’ubwuzuzanye, hagamijwe kubungabunga ibyogogo, kugabanya ibyago by’imyuzure no gutanga amazi ahagije;
guteza imbere ihame ry’uburinganire n’ubwuzuzanye no kudaheza, binyuze mu gukuraho inzitizi zibangamira abagore n’amatsinda atitabwaho mu ifatwa ry’ibyemezo, igenamigambi, ishyirwa mu bikorwa no kugenzura ibikorwa byo guhangana n’ihindagurika ry’ibihe;
kubaka imibereho irambye no kurengera ibinyabuzima by’aho umushinga ukorera;
guhanga imirimo mishya ishingiye ku bidukikije;
kuzamura imibereho myiza y’abaturage binyuze mu kongera ibyanya rusange bitoshye.